世界盃除左係國與國之間嘅戰場，其實仲係運動品牌之間嘅角力，當中特別以Nike及adidas為最大嘅勢力，而adidas過去就更加係足球界嘅龍頭。

睇番今年雙方代言嘅球隊，adidas就坐擁上屆世界盃冠亞軍德國及阿根廷等球隊，而Nike就有法國、巴西、葡萄牙等強隊。不過，世界盃完結後可以一面倒睇到最大嘅贏家就係Nike，因為adidas支持嘅球隊大多早早就出局，而Nike支持嘅法國就奪得世界盃冠軍，就算亞軍克羅地亞都係Nike贊助的。

數據顯示，Nike喺足球界嘅佔有量已經越黎越超過adidas，好似2010年德國世界盃，只有44％球員係著Nike的，而喺2014年巴西世界盃則上升至53％，而黎到2018俄羅斯世界盃，則高達65％球員係著Nike的。

Nike深明足球呢塊餅係「兵家必爭之地」，所以將有更多策略去爭取更多收入。作為Nike旗下嘅籃球品牌 - Jordan Brand，係「籃球之神」Michael Jordan打理的，而主要都係出售有關籃球嘅相關產品，但係如今呢個品牌好有可能將會踩過界，入侵足球領域！

籃球業務方面嘅收入，adidas與Nike有著唔少嘅差距，好似2017年adidas只係從籃球方面賺到4.01億美元，但係Nike就賺到高達12.9億美元，足足超過adidas 3倍。不過相反，喺足球領域adidas喺2016年賺到30億美元，而Nike就只係賺到21億美元，所以呢個數字已經足夠adidas蓋過籃球方面嘅差距。

而眼見足球領域嘅落後，Nike旗下嘅籃球品牌Jordan Brand有指決定踩入足球界，與法甲班霸巴黎聖日耳門合作，成為佢地嘅波衫贊助商。而聖日耳門將成為首支Jordan Brand旗下嘅足球隊，屆時各位球迷就會見到聖日耳門波衫上面印有飛人嘅標誌。

今次Jordan Brand明顯係針對聖日耳門擁有兩大球星尼馬及麥巴比，其中尼馬雖然名聲唔好，但係點都叫做巴西隊嘅領軍人物，而麥巴比就更加係未來金球獎大熱人選，雖然只有19歲但佢已經奪得世界盃冠軍，而其表現就更加係非常驚豔。

雖然Jordan Brand並未真正官方宣佈，但係相信呢個可能性都非常大，因為Jordan Brand嘅Logo已經結合左聖日耳門嘅隊徽印左喺衣服上，而著呢件衫個一位就係喺世界盃揭幕負責獻唱舉中指嘅Justin Timberlake。如果真係成事，相信Nike又有本錢去挑戰adidas足球界嘅龍頭地位。

.@jtimberlake wearing the Jordan x PSG jacket and “Quai 54” Air Jordan 3 in a white colorway pic.twitter.com/iEn9G4uMvZ

— B/R Kicks (@brkicks) 2018年7月3日