今年夏天，雷霆決定放棄上季狀態不佳嘅Carmelo Anthony，將佢交易至有意重建嘅鷹隊。而有意重建嘅鷹隊願意接收Melo，只因想買斷佢份合同從而騰出薪酬空間。而就喺Melo被交易至鷹隊5日後，鷹隊真係買斷佢份合同，而呢位小前鋒預計將會加盟火箭，與James Harden及好友Chris Paul組成三巨頭。

Melo今次被鷹隊買斷嘅合同，係1年價值2550萬美元嘅合同，亦即係話佢短短加盟鷹隊5日就從佢地身上獲得巨額薪酬，換算一下Melo佢喺鷹隊1日就已經獲得510萬美元(接近港紙4000萬元)，被買斷合同成為自由身嘅佢，預計好快會同火箭簽約。

有網友就笑指Melo一日可以搵到510萬美元，已經差唔多等於DeMarcus Cousins為勇士效力一季嘅年薪(533萬美元)，真係令人佩服佢嘅吸金能力。

其實睇番Melo喺NBA嘅生涯，佢絕對係歷史薪酬最高嘅球員之一，即使佢係一名仲未奪得總冠軍嘅球員。

黎緊2018-19球季將會係Melo喺NBA嘅第16個球季，而佢憑住薪酬已經賺得2.528億美元，其中喺金塊7個半球季佢賺得5380萬美元、喺紐約人6個半球季則賺得超過1.47億美元，再加上上季喺雷霆嘅2620萬美元及鷹隊嘅2550萬美元。

Melo 2.528億美元嘅薪酬收入，其實已經可以打入NBA歷史總薪酬榜嘅前五位，其中排名歷史第一嘅球員係「狼王」Kevin Garnett(3.34億美元)，排名第二嘅則係Kobe Bryant(3.23億美元)，排名第三嘅係「巨無霸」O’neal(2.86億美元)，而排名第四位嘅就係如今嘅Melo！

不過，新球季過後LeBron James將會超過Melo，因為呢位「NBA第一人」目前嘅歷史總薪酬為2.37億美元，而新球季佢從湖人將會支取到3565萬美元，賽季完結後佢嘅總薪酬將會超過2.7億美元。

只可以講，Melo喺NBA嘅成就絕對遠不及LeBron James，但係如果以打工仔嘅角度黎睇，Melo絕對係同LeBron一樣嘅打工皇帝，甚至佢可以以無咁輝煌嘅背景去獲得接近一樣嘅合同利益，實在令人佩服。