現今NBA已經變成「不抱團不奪冠」，睇下已經二連冠嘅勇士隊今夏再組成令人驚訝嘅「五條A」Curry+Thompson+KD+Green+Cousins；火箭則宣佈Carmelo Anthony正式加盟，因此佢地新球季將坐擁Harden+CP3+Melo嘅三巨頭。睇見以上嘅陣容，其他球隊就算擁有明星級別嘅二人組亦難以抗衡。

回顧8、90年代嘅NBA，一支球隊大部份都係只有1粒星，頂多就只有兩位星主導球隊，其中好似公牛隊就係Michael Jordan及Scottie Pippen嘅球隊，湖人就係O’neal及Kobe嘅球隊。不過，其實原來當年有一支球隊曾經差一啲就無心插柳組成一個恐佈嘅三巨頭組合，呢支球隊就係火箭。

據火箭傳奇中鋒「大夢」Olajuwon透露，原來喺1984年火箭曾經有機會同拓荒者進行交易，其中拓荒者希望以一位球員及一個榜眼選秀權，換取火箭1983年選中嘅狀元Ralph Sampson。從當時黎睇，Sampson新秀賽季場均取得21分11.1籃板2.4封阻，以新秀身份入選全明星賽，並成為當年嘅最佳新秀。

不過，雖然Sampson嘅個人表現出色，但係球隊戰績仍然惡劣，但正因為咁佢地再一次獲得1984年嘅狀元簽。呢個時候，拓荒者就想以Sampson嘅同屆新秀Clyde Drexler加上1984年嘅榜眼簽換取Sampson。不過由於新秀賽季嘅Drexler上陣時間有限，場均只有7.7分2.9籃板，表現未見突出，再加上火箭想用狀元簽拿下「大夢」Olajuwon與Sampson組成雙塔，因此火箭拒絕左拓荒者。

而火箭呢個決定可能係球隊史上最令人後悔嘅決定之一，因為佢地唔單止拒絕左獲得未來成為全明星嘅「滑翔機」，更甚嘅係放棄左一個可以選上「籃球之神」Michael Jordan嘅榜眼簽。試諗諗，如果當日火箭決定同拓荒者交易，咁即係話佢地將可以繼續以狀元簽得到「大夢」，再用榜眼簽拿下Jordan，最後仲得到Drexler。

雖然事實上Drexler喺1995年都係加入左火箭，並同「大夢」合力贏得NBA總冠軍，但係如果1984年嘅交易能夠完成，單係諗Jordan加上「大夢」呢個組合已經足以橫掃聯盟，更唔好諗再得到身體能力勁爆嘅Drexler，咁樣火箭嘅鋒線上將擁有Jordan及Drexler兩隻怪物。

當火箭真係組成Jordan、「大夢」及Drexler嘅組合，佢地究竟可以贏到幾多個總冠軍呢？簡單啲諗可能係Jordan嘅6冠加「大夢」嘅兩冠，亦即係佢地有機會合力連續8年贏得NBA總冠軍，甚至更多！