籃球場上相信唔少朋友都遇到過「黑洞」，亦即係永遠只會自己射波唔會傳波嘅人，呢類球員作為隊友都真係幾無癮，因為當個波傳到佢手上面，你最多可以做嘅野就係搶籃板。

而喺NBA入面，有部份球員都被標籤為「黑洞」，其中好似Kobe Bryant、Carmelo Anthony、Nick Young等，而Young就更加有「單打王」嘅稱號，其生涯場均助攻數亦只有1次，可以想像到只要佢拎到個波，就絕對會自己完成進攻，甚少傳球。

究竟Young點解會咁自私，喺球場上唔會選擇傳球呢？呢位球迷就代各位向Young問清楚，並叫佢多啲傳球，但係Young就回應傳球並唔Cool，原來就係因為呢個原因令Young對傳球卻步。

Not cool https://t.co/uUAEhOXaxD

— Nick Young (@NickSwagyPYoung) 2018年8月20日

但係打籃球就真係只有得分先Cool，傳球真係唔Cool咩？我諗好多波友同球迷都一定唔會咁諗，因為好嘅傳球絕對可以達到藝術級別，甚至比得分Cool得多啦！

馬刺2014年嘅團隊籃球，透過傳球走位打出嘅籃球被稱為「Beautiful Game」，並以壓倒性嘅實力打敗熱火奪得總冠軍。而個人方面，好似Jason Kidd、Steve Nash、Magic Johnson、LeBron James等都有一等一嘅傳球能力，並透過傳球令球隊變得強大，所以傳球唔Cool？梗係唔係啦！