全場比賽精華

歐洲各大聯賽開始後不久，以往都係國家隊熱身賽嘅時間，但係今年歐洲足協推出全新嘅歐洲國家聯賽，以取代以往嘅熱身賽，令比賽變得更具競爭性，特別係聯賽將接近嘅對手分成同組，賽事可觀性大增。

而岩岩尋晚嘅一場賽事：西班牙vs克羅地亞，就為球迷帶黎一場多入球嘅比賽。貴為俄羅斯世界盃嘅亞軍隊伍，克羅地亞今仗卻踢唔出水準，處處被重新打造嘅西班牙壓住黎打。

經歷左今夏令人失望嘅世界盃，又度過左換帥風波，西班牙如今由鐵腕嘅前巴塞領隊安歷基領軍，而陣容上亦有唔少調整，其中包括使用4-3-3陣式，三箭頭用上阿辛斯奧、摩蘭奴及伊斯高，中場三人則大膽使用尼古斯及施巴路斯，後防亦無揀選佐迪艾巴，反而選上華倫西亞嘅加耶。

而呢套西班牙陣容可以睇得出係以皇馬為班底，再配上部份黎自巴塞、華倫及馬體會等嘅球員，同時陣容上選上更多年輕球員，明顯係為球隊嘅未來舖路。

不過唔好睇班球員非常年輕，佢地位位都係天才型球員，其中特別以阿辛斯奧呢位皇馬新正選射手最出色，佢今仗面對「格仔軍團」踢出大師級表現，評分機構亦為佢打出10分滿分，因為佢竟然個人交出2入球3助攻，助西班牙以6:0大炒克羅地亞！

相信有睇波嘅球迷都一家知道，阿辛斯奧向來最鍾意交出世界波，而今仗亦無令各位失望，兩個入球都係禁區外嘅勁射，雖然第二個入球係帶點幸運嘅成份。而3個助攻阿辛斯奧分別助攻摩蘭奴、沙治奧拉莫斯及伊斯高，實在係令人震驚嘅表現。

如今嘅阿辛斯奧其實只係22歲，無論喺皇馬定係西班牙都前途無可限量，早兩年佢都仲未有穩定嘅上陣機會，個人亦未見非常成熟，但黎到今季C朗嘅離隊及西班牙重建成為其生涯一個轉捩點，佢獲得穩定嘅正選機會從而表現自己，而更重要嘅係佢嘅表現無令球迷們失望，如果佢可以繼續穩步上揚，相信成為超級球星絕對指日可待！