英超開季至今已經進行左4輪比賽，令人意外嘅係曼城並未佔據榜首，但更令人意外嘅係過往一直係中下游球隊嘅屈福特竟然4戰全勝排名聯賽第三位，相信呢一點應該無咩人可以喺開季前估計得到。

開季頭四輪比賽，屈福特分別擊敗白禮頓、般尼、水晶宮及熱刺，其中頭三隊都唔算得上強隊，但面對熱刺竟然都可以以2:1獲勝，說明屈福特絕對唔係單純好運而全勝的。咁究竟當中有咩秘密令呢支球隊變得不一樣呢？

今年1月，屈福特聘請西班牙教頭Javi Gracia作為新任領隊，而今季係佢真正的一個完整賽季，所以好多細節佢都可以重新調節及執行。雖然唔肯定佢為球隊帶黎嘅改變係咪球隊如今真正成功嘅原因，但當中一定起到正面嘅影響。

據球會內部人士透露，今年球隊嘅罰款金額由領隊Gracia決定，而佢決定將罰款調較至非常高，因為佢深知每位球員都好珍惜佢地嘅金錢，而其中一條就係球員遲到每分鍾罰款100英鎊。而球隊遲到最嚴重嘅就要數杜哥尼及賀利巴斯，而杜哥尼則承認自己都唔係經常可以準時，而其他球員唔少都會遲到，所以大家都被罰得很慘。

對於目前意想不到嘅好成績杜哥尼表示，佢地並唔係想仿效2015-16球季嘅李斯特城，佢地今年嘅目標係以前十名完成聯賽，並令球隊變得更加強大。

黎緊一週嘅聯賽，屈福特將要主場面對「紅魔鬼」曼聯，雖然紅魔近期狀態唔算非常好，但係作為豪門實力仍然係非常強橫的，要睇下屈福特今年係咪真係咁硬，呢一關將為佢地驗明正身啦！