搞笑漫畫《銀魂》不知不覺間喺《週刊少年JUMP》已經連載多年，早前更於2018年9月15日發售嘅第42號《週刊少年JUMP》裡面，迎來最終大結局。

正當大家都有晒心理準備要正式同《銀魂》講拜拜之際，竟然收到消息指，雖然《銀魂》會喺《週刊少年JUMP》度結束，但將會喺Jump發行嘅增刊雜誌《Jump GIGA》上，於今個冬天繼續新章故事？！

坂田銀時︰「我哋嘅戰鬥！正要從《Jump GIGA》開始！！」

至於點解會有呢個決定？似乎係因為作者空知英秋對「完結篇」判斷錯誤，佢就自爆原來按照《週刊少年JUMP》嘅做法，喺結束連載前半年就要向編輯部提出，然後成部作品都會向完結篇進行，但作者就判斷錯誤，一路以為《銀魂》可以好快完結，點知畫極都未完，於是唯有喺另一個地方用更多頁數去迎接《銀魂》嘅結局。呢個就係點解《銀魂》會於《週刊少年JUMP》上結束但又喺《Jump GIGA》上另開新章嘅原因。

而聽聞《週刊少年JUMP》所連載嘅《銀魂》只會結束主線內容，去到《Jump GIGA》上，就會回歸返日常內容。雖然令粉絲白白流淚兼虛驚一場，不過得知《銀魂》未真正完結，係開心嘅！