可口可樂或推出含大麻成份可樂

文：MenClub 魏文青　　
POSTED ON 20 Sep 2018

OK，簡單啲講，根據Bloomberg報導，美國可口可樂正研究推出一款新口味飲品，味道係點我唔知，但就可能會有止痛、保護神經、改善濕疹、抗氧化、抗焦慮、抗精神病仲止嘔等等嘅功效，你係咪都有啲與趣？係咪都想試下？但如果我話你知佢呢支新飲品之所以咁巴閉，係因為落咗大麻，咁你又點睇？

根據Bloomberg報導，美國可口可樂正密切注意以化學成份「大麻二酚(英文簡稱CBD)」作為健康飲料成份嘅可能性，而且已經同位於加拿大嘅大麻(Cannabis)公司Aurora Cannabis建立合作關係，消息令後者股價一日之內暴升23%。可口可樂發言人Kent Landers電郵回覆Bloomberg時指：「情況變化萬千，暫時未有最終決定。」但就承認的確係研究緊其可能性。
網上圖片

我知實有人話「有冇搞錯呀，用毒品整嘢畀人飲！」但可口可樂有意使用嘅化學成份「CBD」，其實係大麻中嘅一種「非精神科」成份，唔會令你「High翻天」同上癮之餘，仲有以上如止痛、抗焦慮等藥用價值；至於令人上癮嘅則係大麻中另一種名為四氫大麻酚(THC)嘅成份。換言之佢係想拎大麻中最有用又冇害嘅部份黎製成飲品，咁其實就唔係毒品啦？
網上圖片

事實上可口可樂亦唔係第一間有意使用CBD嘅飲料公司，例如旗下有Corona啤酒嘅Constellation Brands. Inc. 早前就宣佈以38億美元增持另一間加拿大大麻公司Canopy Growth Corp.嘅股份；另一北美釀酒廠Molson Coors Brewing Co. 亦開始與加拿大大麻公司Quebex's Hexo's Corp. 研發「大麻飲品」；就連Johnnie Walker、Guinness同Baileys嘅母公司Diageo PLC. 亦同至少三間加拿大大麻公司商討緊合作；Heineken旗下嘅Lagunitas更已經推出含有THC嘅「Hi-Fi Hops」飲品。

至於各飲品公司之所以咁落力研究，講到尾都係市場因素。一方面北美對於大麻嘅觀感大有不同，雖然於聯邦法例層面大麻仲係違禁藥，但保包括華盛頓及加州等多個州份已經批准使用大麻作藥用或/及休閒性使用，加拿大更加係全國批准，同時年輕一輩對於大麻嘅熱衷亦令廠商睇到謀利空間。另一邊廂，傳統飲品增長疲弱，廠商需要尋求新出路，如可口可樂早前收購Costa Coffee，近年亦致力開發果汁、茶及礦泉水等飲品。
網上圖片

以香港嘅民情黎講，相信短時間內都好難接受含有大麻成份嘅飲品，但若然真係有機會，你又會唔會試下呢？
Bloomberg