昔日嘅籃球都係所謂「一寸高一寸強」，只要你有身高及身型基本上就可以統治比賽，好似「巨無霸」O’neal、「上古神獸」Wilt Chamberlain、「指環王」Bill Russell等等，就係以往有能力統治NBA嘅絕對大個子怪物。

不過，自從三分球越黎越受重視，再加上小球戰術快節奏又備受推崇，欠缺速度及三分球能力嘅傳統中鋒日漸消亡，唔想被淘汰嘅內線球員紛紛練習三分球，同時要令自己能夠喺球場上快速奔跑。

JaVale McGee - 湖人今季嘅新正選中鋒人選，呢位昔日勇士嘅冠軍中鋒未有留隊，轉而去輔助LeBron James。而作為身高7呎嘅中鋒，McGee擁有出色嘅身體質素，而如今嘅佢更加擺脫左「腦殘」特性，真正成為一名高效嘅內線球員。

對於現今中鋒凋零嘅情況，McGee揚言NBA正密謀淘汰好似佢呢類型嘅傳統大個子中鋒。McGee：「現在(中鋒)情況真係非常困難，因為佢哋好似唔想我哋係度比賽。佢哋嘗試踢走我哋，其中一個最明顯嘅例子係，全明星賽投票取消了中鋒的位置。」2012-13球季，NBA宣佈全明星賽投票位置由「2後衛2前鋒1中鋒」變成「2後衛3前鋒」。

由於各支球隊都想提陣容嘅機動性，所以每個球員嘅位置變得越黎越模糊，一個球員可能需要打盡場上5個位置，呢一點從前係完全無可能發生的。

面對聯盟球風嘅轉變，McGee表示佢哋呢班中鋒完全沒有選擇嘅餘地，佢哋只可以一方面繼續防守後衛，同時又唔可以要求場均轟入40分(以滿足入選全明星)。不過佢哋仍然非常努力打波，並盡力調整自己嘅比賽方式，因此佢哋唔會再經常留喺籃底，反而更多跑到外圍。

("We don't even have a choice, We have to go against guards, and we're not going to score 40 [to get the same All-Star consideration]. It's just, we work hard, though, so we have to adjust our game the way everybody else does; so now we don't stay back [by the rim] as much, we're up [on the perimeter] more, we know how to switch.")

「所以，我認為這是進化。」

作為2008年首輪第18順位嘅新秀，McGee曾效力過巫師、金塊、76人、獨行俠及勇士，到如今的湖人，佢一直調整自己。而當年比McGee高一個順位擁有7尺2寸的Roy Hibbert，雖然曾成為全明星，又助球隊取得成功，但由於無速度及三分球能力，所以如今已經被淘汰，無辦法再喺NBA立足。

McGee回憶以往嘅自己只會運用自己嘅運動能力，但如今嘅佢更多考慮自己究竟做緊啲乜，同時又要保持自己嘅身體狀態，特別係佢曾經身體去到280磅，空有體型嘅佢卻跳唔起、跑唔郁，只係感受到好疲累。

如今已經加盟湖人嘅McGee，預計將成為球隊嘅正選，佢嘅主要工作將會係利用佢嘅體能天賦喺籃底入樽，防守端則好好守護籃框，必要時候跑出三分線施發冷箭都得。

昔日中鋒跑出三分線射三分一定會被教練鬧到狗血淋頭，但如今如果你唔識射三分，即使你識「夢幻舞步」都會被嫌棄，呢個就係時代嘅唔同，亦都係一眾傳統中鋒嘅唏噓。