《魔劍美神》（スレイヤーズ）係由日本輕小說家神坂一撰寫，由あらいずみるい插圖，富士見Fantasia文庫發行嘅奇幻輕小說，後來因為廣受歡迎，於是改編成多部電視動畫、漫畫、廣播劇、遊戲等作品。而《魔劍美神》嘅故事係描述魔法師莉娜·因巴斯同佢嘅伙伴周圍冒險時所留下嘅種種事蹟。

由於《魔劍美神》曾經紅極一時，所以當佢睽違18年後宣佈會再出長篇新刊，大把人都感到極為興奮！富士見Fantasia文庫仲將過去嘅集數全部再版，並大規模宣傳第16集即將發售，甚至請埋作者神坂一老師舉辦簽名會！

不過老老實實，隔咗咁多年再睇返，真係個個都記得《魔劍美神》嘅劇情同設定咩？作者就好誠實咁喺第16集嘅「作者的話」中表示，自己一早將設定忘記得一乾二淨，好彩而家網路資訊發達，佢睇完先記得返啲故事……

不過點都好，最重要係有得再睇返《魔劍美神》呀！