摩連奴同曼聯近期可以話頹勢不止，雖然上週成功險勝榜尾嘅紐卡素，但岩岩一週與車路士嘅強強對碰中，喺補時階段最後時刻被對方追平，錯失擊敗藍軍嘅機會及痛失兩分，令「紅魔鬼」喺聯賽嘅排名已經下跌至第10位。

而更令摩帥雪上加霜嘅係，佢喺與車路士嘅比賽前幾個鐘頭前發現，只有曼聯球員及內部人員先知道嘅正選陣容竟然被洩露出去，並在社交媒體上廣泛被傳播，說明球隊內有二五仔將消息外洩，因此摩帥已經啟動內部調查，勢要將呢個二五仔揪出黎！

對於正選陣容被洩露，摩帥非常憤怒，因為這令對手提前得知佢嘅陣容安排，特別係佢派上馬達作為中場，原意係為左出奇不意的，但陣容外洩令摩帥如意算盤打唔響。

對於今次陣容外洩事件，暫時未知究竟係何人所為，會唔會係同摩帥不和嘅球員？定係部份受到媒體利誘嘅工作人員呢？相信摩帥一定會為呢個人搵出黎。

而唔知係咪因為呢件事而影響心情，再加上喺比賽最後階段被追平，摩連奴喺比賽完結後被車路士助教嘅挑釁激嬲，想追打呢位車路士助教，但好彩有現場保安及雙方球員過黎阻止，否則摩帥可能會因為打人而被迫停賽了。