全場比賽精華

尋晚歐聯戰火重開，其中一場焦點賽事就係曼聯主場迎戰祖雲達斯，而焦點中嘅焦點當然就係C朗拿度重返奧脫福面對舊東家。最終C朗拿度表現果然無令球迷失望，多次交出極具威脅嘅射門，最終帶領祖記1:0小勝曼聯，而要不是迪基亞「天神」下凡，呢場曼聯可能唔只失一球。

面對舊東家，C朗繼續全程投入，表現搶眼，並交出數次極具威脅嘅射門為迪基亞帶黎麻煩，但係迪基亞今場表現神勇，多次救出險球，其中包括C朗嘅招牌罰球，及幾球祖記球員嘅勁射。

可惜嘅係，無論迪基亞點努力都好，如果曼聯後防出錯最強大嘅盾都係有失守嘅時候，戴巴拿就成功喺17分鐘門前「執雞」成功，而就係憑住呢一球，祖雲達斯成功小勝曼聯。而三戰過後祖記暫以3戰全勝排名小組第一，而曼聯則以4分排名第2位。

睇番今日呢場波嘅數據，祖記可以話完爆曼聯，前者全場控球率達到60%，射門次數則有11次，比曼聯多出6次，雖然曼聯都偶有攻勢，但未見入肉，進攻情況仍然未有改善。而更令人擔心嘅係，曼聯領隊摩連奴未能改善球隊情況，卻對球迷作出挑釁，多次舉出3隻手指示意自己嘅成就，究竟摩帥能唔能夠解決今次曼聯嘅內憂外患呢？