《戰國英雄》（日語：キングダム）係日本漫畫家原泰久於2006年開始喺集英社雜誌《週刊YOUNG JUMP》上連載嘅漫畫，並於2012年改編成同名電視動畫。《戰國英雄》故事以未曾經歷統一、戰亂不止嘅中國戰國時代為舞台，主角李信係一位秦國少年，佢因為戰亂而失去雙親，並喺收留自己嘅里長屋企入面過着奴隸般嘅生活。里長屋企仲收留咗名叫漂嘅戰後孤兒，身為孤兒嘅信同漂並冇因為身份卑賤而失去志向，反而喺戰事頻繁嘅亂世中，立志要成為大將軍，兩人一同苦練武功。佢哋以成為名震天下嘅大將軍為目標，每日磨練自己，等待機會建功立業。某日，漂被帶入宮中任官，及後瀕死嘅漂返到屋企，信喺漂指引下，見到因為政變而被追殺嘅秦國大王嬴政，佢戎馬天下嘅人生就由此拉開序幕……

而呢套《戰國英雄》嘅真人版電影將會由佐藤信介擔任監督，黒岩勉、佐藤信介及原作者原泰久負責劇本；演員方面，主角「李信」、秦王「嬴政」分別由山崎賢人同吉澤亮飾演，隱藏女性身分嘅山地住民「梟鳴」末裔「河了貂」會由橋本環奈飾演；秦國六大將軍最後一人「王騎」由大澤隆夫飾演；王騎軍嘅副官「騰」由要潤飾演；嬴政嘅心腹兼教師「昌文君」由高嶋政宏飾演；昌文君副官「壁」由満島真之介飾演；戴著恐怖面具嘅山之國大王「楊端和」由長澤正美飾演；贏政嘅弟弟「成蟜」則由本郷奏多飾演。

不同於漫畫同動畫，作者原泰久表示，自己喺電影中追加咗一啲同原作唔同嘅橋段，並針對部分場面進行修改，希望可以令電影更加感動人心，佢話就連自己睇嘅時候都忍唔住五度落淚，粉絲們聽完有冇更加期待先？一齊睇睇預告片段吸唔吸引到你哋先啦！