體育精神可能係人都識講，但係真正可以彰顯出黎卻一啲都唔容易。不過，日前一場日本全馬馬拉松接力賽，就有一位19歲女跑手完美展示咩叫體育精神！

較早前在日本福岡市舉行嘅Princess Ekiden企業女子冠軍賽嘅預選賽，一位年僅19歲嘅女跑手飯田怜，不慎與其他選手發生碰撞而倒地，倒地後飯田本想企番起身繼續跑，但佢發現自己已經做唔到，但又唔想退出比賽，因此佢決定爬行以完成自己嘅路程。

雖然距離交棒只係300米，但係呢個可能係飯田有生以黎最難走嘅300米，佢強忍痛楚及汗水喺粗糙嘅馬路上不斷爬行，旁邊嘅工作人員亦不斷為佢打氣，而作為準備接棒嘅隊友見到飯田堅持亦忍唔住流出眼淚，最終成功交棒後飯田兩膝充滿鮮血，並接受醫護人員嘅治理。

經檢查後，發現飯田右腿徑骨骨折，預計至少要休養3個月。不過問題黎啦，有人覺得飯田咁樣堅持好熱血好有體育精神，但係將比賽凌駕於自身健康又係咪值得呢？有人質疑大會點解唔阻止飯田比賽，要知道咁樣夾硬帶傷堅持隨時影響其運動生涯，就好似《男兒當入樽》主角櫻木花道咁，腰部受傷堅持繼續比賽，比賽最終係贏了，但差啲斷送自己嘅運動生涯。

究竟喺好似飯田咁嘅情況下，係咪應該堅持執行體育精神，絕對值得我地思量一番。