「紅魔鬼」曼聯目前聯賽暫以20分排名第8位，落後榜首嘅曼城多達12分，就算只係與第4位嘅熱刺相比亦有7分差距，來季要想打入歐聯前路並唔明朗。面對外憂內患，曼聯領隊摩連奴相信近日都一定非常痛疼，而更頭痛嘅係，有傳曼聯隊中表現最出色之一嘅門神迪基亞拒絕續約可能會離隊他投。

目前，曼聯正與明年夏天就會約滿嘅馬達、靴里拉及楊格進行續約談判，球隊方面對於三位球員嘅續約情況感到樂觀。不過，有一位球員嘅續約就可能令曼聯感到困擾，佢就係球隊嘅首席門神迪基亞。

迪基亞與曼聯嘅合同同樣喺明年夏天到期，但球隊有選擇權在明年夏天自動續約1年至2020年夏天。不過，由於曼聯今季表現令人失望，所以迪基亞極有可能喺來季結束後以自由身離隊。有見及此，如果曼聯方面真係唔能夠續約迪基亞的話，為免人財兩失，曼聯絕對會及早將佢賣掉減低損失。

據聞曼聯方面已經為28歲嘅迪基亞開出27.5萬鎊嘅週薪，但呢位西班牙門神仍然無意簽下續約合同，因為球隊自從費格遜領隊退休後就好似難以喺聯賽登頂。

消息指，意甲班霸祖雲達斯自從保方離隊後正需要一位世界級門將，而佢地已經密切留意迪基亞嘅動向，預計如果到月適當嘅時候，班馬軍團一定會出招攬呢位門神，就好似當日佢地簽下C朗拿度一樣。