據唔少消息報導，大家都一定知現效力巴黎聖日耳門嘅巴西球星尼馬有意重返西甲，其中舊東家巴塞隆拿係佢嘅首選，而皇馬亦都係其潛在買家。

而最新嘅消息有傳，PSG方面已經同尼馬傾掂數，只要有球隊願意為佢付上2億歐元嘅轉會費，咁樣佢明年夏天就可以離隊。雖然2億歐元轉會費已屬天價，但係當日PSG係以2.22億歐元將佢由巴塞帶走的，所以一來一回PSG係要蝕2200萬歐元的。

雖然尼馬首選係重返巴塞隆拿，但係如果巴塞並無意回購呢位球星，咁樣尼馬亦都願意加盟皇馬。目前正處於水深火熱嘅皇馬，正需要一位巨星黎頂替C朗拿度嘅空缺，雖然佢地已經有摩迪、巴利、賓施馬等人，但都難以填補C朗嘅位置。巴塞方面，佢地係有意再次收購尼馬的，一方面佢地想唔要迪比利，但一方面佢地又可能因歐洲足協嘅財政公平原則難以拋出2億元。

目前，尼馬雖然係PSG嘅頭號球星，但仍然有相當多嘅不滿，其中隊友麥巴比嘅暴升直接影響住尼馬嘅地位，再加上佢曾與烏拉圭射手卡雲尼傳不和，同時球隊亦未能助佢衝擊金球獎等獎項，所以重返西甲可能對佢更有利。

不過講真，如果用2億收購尼馬，不如試下用2億收購麥巴比可能仲有著數，要知道麥巴比如今都只係19歲，比尼馬足足細8年，加上實力及進步空間極高，但當然PSG肯唔肯放麥巴比就係另一回事了。