《惡之華》係押見修造嘅日本漫畫作品，作品取名自法國詩人波特萊爾同名詩集《惡之華》（Les Fleurs du mal）。故事講述性格怯弱嘅主角春日高男一直沉迷法國詩人波特萊爾嘅詩集《惡之華》，有日佢陰差陽錯下拎走咗暗戀對象佐伯奈奈子嘅運動服，過程被同班同學仲村佐和見到，仲村藉此要脅春日同佢訂下契約，並屢次強迫春日做出一啲怪異行為，與此同時，春日亦嘗試同佐伯修補關係。一段環繞住三人嘅扭曲關係就此展開。

其實《惡之華》並唔係第一次改編為真人化，佢喺2013年嘅時候曾經推出過動畫，不過當時製作組係想令觀眾覺得動畫畫面同人物都好真實，所以採取先拍攝真人版影像，再轉為動畫畫面嘅製作模式，但可惜畫面出到嚟實在太怪異，感覺令人強差人意……

而呢次真真正正推出真人版電影，據消息指，將會由岡田麿里負責劇本，井口升擔任監督，至於演員方面，就仲未有透露，唔知到時會唔會出現大家都熟口熟面嘅演員去參演呢套獵奇作品呢？