唔好睇一班巨星喺NBA可以呼風喚雨，但其實要想喺NBA立足真係非常之唔容易，即使你曾經係選秀狀元、榜眼或者探花，亦都可能好快會被淘汰，甚至喺NBA入面完全無球可打。

作為2015年嘅選秀探花，Jahlil Okafor絕對明白要喺NBA站得住陣腳絕對係需要天時、地利及人和，而佢近來就可能迎來一個轉捩點。

加入NBA前，Okafor可以話係NCAA嘅明星球員，甚至一度係狀元大熱，最終卻落後於Karl-Anthony Towns及D’Angelo Russell，只能成為探花。不過，加入76人嘅Okafor好快就打出身價，其地位技術出色，再加上場均17.5分7籃板作為新秀絕對係合格有餘，唯獨防守及欠缺3分球係佢需要提升嘅地方。

雖然籃底進攻能力出色，但由於沒有3分能力，所以Okafor並不適合現今NBA嘅打法，所以佢獲得嘅機會變得越來越少。最終喺Joel Embiid復出後，Okafor好快就被放棄及交易掉。最終，輾轉下Okafor今季加盟鵜鶘，成為Anthony Davis嘅替補人選，但基本上上陣嘅機會都係寥寥可數的。

不過皇天不負有心人，Davis近5場只傷並無上陣，Okafor終於等到機會，成為球隊嘅正選，上陣時間大幅增加至場均32.8分鐘，而獲得機會嘅佢亦無令球隊失望，呢5場佢場均交出21.2分11籃板2.6封阻，數據絕對可以話係達到全明星級別，較為可惜嘅係呢5場球隊只係錄得2勝3負嘅戰績。

較早前，Davis公開表示想離開鵜鶘，令球隊已經考慮將佢交易，喺呢個情況下失去主力內線嘅佢地會進一步使用Okafor，佢將會獲得更多機會去表現自己。

就好似今日咁，Okafor繼續正選上陣面對實力強大嘅火箭，而佢就展現自己內線嘅實力，多次衝擊火箭內線，最終15投11中，罰球5罰全中下取得全隊最高嘅27分，外加12籃板2助攻2封阻，數據上絕對不比Davis差，最終更助鵜鶘爆冷擊敗火箭。

果然NBA真係一個充滿奇蹟嘅地方，即使你本來幾唔如意都好，只要一個機會你就有可能谷底翻身，唔知Okafor可唔可以再次搵到自己嘅角色，喺NBA穩定下來呢？