作為車路士正選門將嘅艾利沙巴拿加，尋日在與曼城嘅聯賽盃決賽上繼續披甲上陣，而雙方法定時間踢成0:0平手，要互射12碼分勝負，最終車路士以3:4不敵曼城，同時呢一場可能係艾利沙巴拿加車路士生涯嘅最後一戰。

在比賽進入至加時最後1分鐘，車路士領隊沙利決定以後備門將卡巴尼路入替艾利沙巴拿加，但就喺呢個時候，艾利沙巴拿加竟然拒絕離場，佢不斷表示自己無問題，叫沙利取消換人，完全無視教練決定，死都唔肯離場。

站喺場邊嘅沙利走到球證旁邊，並不斷大叫要艾利沙巴拿加離場，但最終仍然無法叫走對方，佢只能夠放棄換人，而隨即心中怒火爆發，甚至扯開自己件衫，並一度走到球員通道貌似離場。

沙利決定換走艾利沙巴拿加，除左因為卡巴尼路曾係曼城球員，對撲球對方嘅12碼有一手，因此可能佢喺球隊擊敗曼城嘅絕殺手段。另外，艾利沙巴拿加喺加時賽期間曾倒地受傷，因此沙利換出佢亦可能因為以為對方已經有傷在身。

最終，雖然艾利沙巴拿加在互射12碼中表現不俗，但球隊還是落敗，所以艾利沙巴拿加仍然成為眾矢之的，外界不斷炮轟佢無視教練指示，連最起碼尊重教練亦做唔到，係毫無職業態度嘅行為，車路士應該即刻將佢解僱。但車路士另一個問題亦暴露，就係沙利根本無辦法控制球員，球員比教練權力更大。

艾利沙巴拿加作為世界最高身價門將(8000萬歐元轉會費)，今次行為難以令人接受，相信佢應該會受到球會處分，而在球會嘅前路係點就要睇下佢同沙利點解決了。