搞笑漫畫《銀魂》不知不覺間喺《週刊少年JUMP》已經連載多年，早前更於2018年9月15日發售嘅第42號《週刊少年JUMP》裡面，迎來最終大結局。正當大家都有晒心理準備要正式同《銀魂》講拜拜之際，竟然收到消息指，雖然《銀魂》會喺《週刊少年JUMP》度結束，但又會喺Jump發行嘅增刊雜誌《Jump GIGA》上，繼續新章故事。不過開心嘅時光過得特別快，喺《Jump GIGA》嘅連載故事又再次接近尾聲，唔通今次真係要同《銀魂》講拜拜？！

唔使驚！淡定有錢剩，經常彈出彈入嘅空知英秋又再一次Fake大家，表示《銀魂》漫畫尚未完結，嚟緊將會喺「銀魂官方App」繼續連載，畀讀者免費閱讀。

雖然用App睇漫畫係冇咁方便，不過對於《銀魂》粉絲而言，最緊要係仲可以繼續追《銀魂》！