今日相信有一段時大家嘅FB同埋IG都會被施丹重返皇馬執教一事洗板，而各位球迷應該都有唔少疑慮，認為施丹為何要重返皇馬？會唔會做花自己咁靚嘅CV呢？其實施丹都唔係蠢人，佢食得回頭草絕對係因為食得過先會翻去的。

首先，最簡單嘅當然係人工。施丹今次重返銀河艦隊，人工將大跳一級，由原來嘅年薪950萬歐元跳升至1500萬歐元，而1500萬歐元更加係除稅後嘅金額，相比起另一邊有意請施丹嘅祖雲達斯，後者只係上價800萬歐元，難怪施丹會拒絕祖記答應重返皇馬。

除左金錢嘅誘因之外，球隊嘅話事權當然係今次施丹回歸執教嘅重中之重，因為去年施丹離隊有傳正正係因為對買賣球員無話事權，令佢並未能組建自己想要嘅陣容，所以先憤而離隊。而今次決定重返皇馬，主席佩雷斯嘅讓步及放權當然有番咁上下。

報導指，佩雷斯將會完全放權比施丹去組建球隊，球隊嘅買人賣人將會由施丹全權話事，佢將可以獲得更自由嘅空間去組建最強嘅球隊。因此，預計一些與施丹不合嘅球員，例如巴利預計將會被賣走，而車路士嘅夏薩特將成為球隊嘅引援嘅第一目標。

另外，施丹去年離隊雖然貌似與佩雷斯意見不合，但消息指施丹心入面仍然非常熱愛皇馬，並對皇馬存有感激之情，因為不論在球員時代及領隊時代球隊對佢嘅支持都非常大，而佩雷斯今次亦相當有誠意咁打電話比施丹，所以相信二人嘅關係應該仍然係正面的，所以先可以再次邀得施丹出山。

Zidane: “I love Real Madrid and this president, that’s why I’m back” pic.twitter.com/VPS4U48mMi

— Florentino Pérez (@RealFloPerez) 2019年3月11日