美國卡通　變身兵馬俑

文：MenClub Patrick　　圖：互聯網
POSTED ON 18 Dec 2014

根據TBB古天樂版《尋秦記》嘅橋段，呢單嘢一定係成班卡通公仔未來人穿越回到秦朝，秦始皇見佢哋咁得意，於是下令叫人將佢哋整成兵馬俑，守護自己個陵墓，等自己落到地府都有公仔玩。

好，9噏完，講番堅嘅。其實呢個係美國藝術家Lizabeth Eva Rossof嘅project，叫做「西安－美國聯合戰士」，角色暫時有《阿森一族》巴特、蜘蛛俠、蝙蝠俠、史力加同米老鼠5個，每個都整緊大堆30至40cm唔同服飾嘅兵馬俑仔，有皇帝又有士兵，另外仲開始整緊人咁高嘅1:1卡通兵馬俑。為求跟得更足真實兵馬俑，Lizabeth Eva Rossof仲特登搵咗西安一間複製品工作室幫手整。但係到底點解會諗出呢個idea？Lizabeth Eva Rossof話係為咗探索美國媒體對世界嘅影響力，同埋中國嘅仿製產業，好似幾大美國主義同寸強國喎。阿爺留意到呢單嘢嘅話，可能又會話係外部勢力入侵㗎喇。