有得訂！馬沙專用G-SHOCK

文：MenClub Patrick　　圖：互聯網
POSTED ON 22 Dec 2014

嗱嗱嗱，睇完相，大家都應該知呢隻係乜嚟，不過我唔想再硬tag「紅色、3倍速」乜乜乜，因為已經講到好厭喇...... 我淨係想講，呢隻都係屬於高達35周年紀念商品嘅新版馬沙專用G-SHOCK，終於定咗喺下年3月正式推出，由而家至到1月7日可以上官網訂，定價21,384円（約$1,387）。

今次官方只係講限量，冇講到限量幾多隻，但係根據2010年嗰隻舊版馬沙G-SHOCK，同早排RX-78-2 G-SHOCK嘅經驗，呢隻新版馬沙G-SHOCK唔俾人喪搶喪炒先奇啦！所以，趁而家有得訂就好訂喇，雖然訂完都係要抽籤，但總算有個希望。不過sorry，隻錶要有日本地址先至訂到，喺日本有朋友嘅話，就快啲請佢出手啦；冇嘅話，都可以去代bid舖問問幫唔幫到手嘅，計晒所有手續費同運費，都好大機會平過買炒價貨㗎！祝大家好運！最後仲想講埋，呢個「高達35周年」終於都就嚟到完喇，但就算係36周年咁零丁，咪一樣會有其他名目繼續出大堆商品，唔好諗住可以收手，咪好傻好天真啦！訂購網址：p-bandai.jp/item/item-1000095193

畀番隻舊版馬沙G-SHOCK大家望吓，新呢隻真係型好多喎。