去外地旅行好多時除咗食買玩之外，都會想體驗一下當地傳統文化，就好似港女去日本，就算大熱天時都一樣嘈住要著和服「體驗」做大和撫子嘅感覺。不過對男人而言，著和服似乎唔係特別大吸引力，有得畀你試，揮下日本刀感受下武士精神係咪仲爽皮先？雖然日本有好多開放畀人觀摩嘅武術道場，不過作為唔識日文嘅遊客而言，好多時都得個睇字冇得親身體驗。不過原來京都有一間武術道場「武士塾」，主打用英文溝通，方便遊客可以體驗武士文化，仲可以拎住把有400年歷史嘅刀劈下稻草咁話喎！

根據官網，「武士塾」全套體驗課程大約90分鐘，先更衣並且學習日本刀以及武士歷史，然後就學習拔刀、揮刀、收刀等等動作，最後就可以砍稻草柱架喇！

至於體驗價格方面，官網就寫住一人一萬日圓，雖然可以現場報名，但建議大家最好事先預約就最穩陣。如果巴打黎緊去京都又有興趣試下做武士，可以上「武士塾」官網睇睇︰https://www.samuraijuku.com/