雖然英超利物浦將終未能逆轉曼城奪得聯賽冠軍，但佢地最終喺歐聯賽場上擊敗熱刺，相隔14年後再次奪得歐聯冠軍。而帶領球隊完成呢個偉業嘅頭號功臣，相信必定係領隊高普。對於高普嘅執教能力，利物浦高層亦都看在眼內，所以決定將會為呢位領隊奉上一份新合約，希望長期留住佢。

2015年開始入主利物浦51歲嘅高普，目前與利物浦嘅合同到2022年先會到期，不過睇見佢今季帶領利物浦出色嘅表現，特別係成功奪得歐聯冠軍後，利物浦高層決定提前為高普開出續約合同，並預計將會為佢大幅加薪。

現時高普喺利物浦嘅年薪為700萬鎊，相信球隊為佢開出嘅新合同年薪將至少達到1000萬鎊。而1000萬鎊嘅年薪將令高普升至英超教練年薪第二高嘅位置，僅落後曼城領隊哥達奧拿，不過哥帥嘅年薪卻達到2000萬鎊，足足係高普嘅一倍。而排名第三位嘅則係熱刺領隊普捷天奴(850萬鎊)，曼聯領隊蘇斯克查則為750萬鎊，排名第四位。

能夠長期留住高普，對於利物浦黎講絕對係好事，首先佢對球隊嘅了解已經非常高，臨場嘅調兵遣將嘅能力亦絕對係頂級，再加上球員們亦非常尊重高普，所以相信未來利物浦嘅前路仍然係非常光明的，喺高普嘅手下佢地絕對有力去挑戰未來嘅英超冠軍。