呢隻巨靈神EX合金，有成265mm咁高，仲要大部分組件都係用金屬造，斤兩十足。佢亦有幾多可動組件，好似手腕外圍嘅突刺能夠反出變成破碎鑽、胸甲都打得開兼可換上「反重力射線」發射器等等。佢支月牙剷仲唔止可以一分為二，頭尾更加能夠轉換尖釘或者斧刃。

不過，作為巨靈神精髓嘅飛碟，呢隻EX合金就唔送，只送架識變形嘅飛機，裝喺巨靈神背脊上面。套EX合金會喺4月推出，定價39,800円（約$2,566），都唔平；好想要埋隻飛碟嘅話，遲啲都有得另外買嘅，但係仲未知幾錢，連完成品都未有相睇。