BT Sport日前宣佈，前荷蘭名將雲佩斯正式加盟成為比賽評述員，相信大家對呢位傳奇射手應該唔會陌生的。

35歲嘅雲佩斯，今年5月喺飛燕諾正式掛靴，而佢無選擇做教練，而決定去體育台做球賽評述。不過，對於呢位射手就唔係人人受落啦，特別係一眾阿仙奴球迷。

喺BT Sport介紹雲佩斯加盟嘅宣傳片中，可以睇到佢著起阿仙奴嘅波衫，又著起曼聯嘅波衫，隨即勾起一眾阿記球迷嘅不滿，甚至有人表示唔會再睇BT Sport，亦都有球迷話留名等幾年後睇佢轉投天空體育。

都好難怪阿記球迷咁嬲，當年作為球隊主力竟然選擇轉投死敵曼聯，仲喺面對阿仙奴嘅比賽中入球後激烈慶祝，令所有阿記球迷非常不滿及憤怒。唔知黎緊一季當阿仙奴遇上曼聯時，雲佩斯又會點評述比賽呢？