「Autobots Roll Out！」相信一聽到呢句，你都知係變形金剛Transformers出動嘅時候，現實當中當然無Transformers拯救人類(最多只有變壓器...)，但係Transformers可以係一個精神，係宣揚任何生命都係平等，都有生存落去嘅權利。而日本品牌Asics今次就與Hasbro聯手，為大家帶來變形金剛聯乘波鞋。

今次《Asics x Hasbro》將帶來變形金剛中三個經典角色，佢地分別係博派嘅柯柏文、大黃蜂以及狂派嘅麥加登，並將佢地融入鞋款當中，同時配合變形金剛嘅變化特色，令波鞋可以隨意配搭，增加玩味性。

外型上，大家可以睇到鞋舌印有博派及狂派嘅標誌，配合魔術貼嘅特性，用家可以隨意改變組合，而同時又免卻綁鞋帶。另外，鞋墊亦都睇得出今次設計者嘅心思，因為上面印有變形金剛漫畫嘅部份內容，令整對鞋更加統一。