今年你話係犯太歲定繼續賀歲呢？如果你選擇賀歲咁就真係恭喜發財，唔駛去韓國發大財，香港都有，今年最新賀歲喜劇，90年代黃百鳴、張國榮加周星馳《家有囍事》賀歲片中經典，到底仲有無得重新回頭再接再厲。今次向世界Sell台前幕後全香港班底由黃百鳴夥拍鮮有拍攝喜劇的張智霖，及新一代笑匠張繼聰，作為故事中三兄弟骨幹角色。加上娜姐同陳靜同一大堆香港影視紅星，過年又來，劇情？肯定意料之外，恭喜發財呀............

不如投過票，有無人未睇過經典電影《家有囍事》？如果睇過超過三次舉舉手，92年黃百鳴、張國榮加周星馳的92《家有囍事》絕對係香港電影的超經典之作，講真我又唔覺得 《家有囍事》無里頭，仲覺得好好睇好好笑，來到2020年，世界是否不再一樣，仲有無得繼續《家有囍事2020》呢？如果可以，我都想開開心心去戲院睇你恭喜發財呀，但今時今日「發大財」同講聲「加油」係兩個唔同的選擇，雖然我地永遠都唔知明日如何，如果世事愈來愈美善，入場恭喜發財當然是一件美事。誰不想馬照跑舞照跳.........

《家有囍事2020》，故事圍繞著三兄弟，表面是尋常人家，實際為精通千術的業餘俠盜；機緣巧合下，三兄弟遇上了老千兩姊妹，大家惺惺相惜，聯手用魔術、千術等方法，將作惡多端的黑幫頭目譚耀文繩之於法。身為導演兼演員黃百鳴話：「故事很多橋段都係意想不到，有千術、賭術、魔術，娛樂性好豐富，笑之餘亦有溫情。」

而預告中可見各演員造型百變惹笑：醫生、護士、魔術師、兔女郎以至「任何仁」裝束都應有盡有；爆笑彈就要靠新一代笑匠張繼聰今次又玩中槍又玩「露鵰」，其實都只想引你一笑，少有拍喜劇的張智霖都參與新世代恭喜發財的責任：「聽到《家有囍事》四字已經充滿歡樂，亦係賀歲金漆招牌。」近年唔再玩性感的周秀娜，今次大露背、又好像只穿底褲示人，周秀娜話：「今次同陳靜做兩姊妹，佢賣腦我賣力。大露背都係因應劇情、唔刻意，拍嘅時候亦清場做足安全措施，唯一困難，係點樣打住但要捲得條毛巾靚。」

同時，電影全香港班底，一眾都係大家耳熟能詳笑匠加盟演出，包括羅家英、陳淑蘭、羅蘭、詹瑞文、廖啟智、苑瓊丹、張達明、林敏驄、麥包等，及很久沒在香港大銀幕出現的黃一山，配上吳千語、栢天男、陳庭欣、張建聲、劉浩龍、張彥博、陳嘉佳、黃祥興、張敬仁、仲有微辣成員六毫子及Paul等，新舊班底演員組合令觀眾耳目一新，帶來滿滿新鮮感！到底《家有囍事》仲有無得玩落去，香港仲可唔可以繼續當年的路？

恭喜發財，香港發大財啦！