有啲演員例如亞當迪凡， 一睇就知係喜劇專家，呢部笑片劇情搞鬼有趣，幾創新，簡單講就係神級電話AI女同你條真人女友爭仔，當手機親密過真人，有手機已經可以代替女朋友，而呢套野有個靚聲智慧AI 叫Jexi，幫主角管理所有生活所需，但當主角亞當迪凡開始生活多資多彩時，部電話呷醋，無錯，識得呷醋有佔有欲的電話AI居然唔係恐怖片，係一部輕鬆笑片，電話讓人又愛又仇，要做到好笑幽默有嘲諷又讓大家有共鳴難得，但咁的劇情唔恐怖其實係幾可怕，搞到我都好想睇呢部《擇洗溝宅男》搞咩鬼！

通常睇戲睇前作，呢部電影的創作人喜劇橋王鍾魯卡斯&史葛摩亞即係《醉爆伴郎團》個班底，今次以智慧電話作為啟發點，引用人類對智慧電話的依賴去創作搞笑故事，橋段其實唔算真好創新，但用電話去代入，將電話轉換成一個重要角色就幾新穎。導演表示本片透過趣味角度來看待人工智能議題，講述現代人手機成癮荒謬性的時機：「這部電影要獻給對手機又愛又恨的大家。你實在喜歡手機，但又納悶是否過度使用手機，這是對這個經驗的嘲諷與共鳴。」

喜劇天后露絲拜恩（Rose Byrne）今次為電影關鍵角色AI「澤茜」配音，成為呢套戲的重點，Rose時常客串喜劇，曾演出《賤鄰50》（Neighbors）、《最爆伴娘團》（Bridemaids）等，也曾在科幻電影《AI終結戰》（I Am Mother）當中扮演機器人「母親」的聲音演員，以讓人安心的穩重聲線讓觀眾印象深刻。今次單純聲音的出位演出唔知可唔可以叫最佳女配角。

故事大綱其實有無少少似你，當「Siri」係命根的宅男阿肥(亞當迪凡 飾) ，趁換手機改投超人工智能助手「澤茜」(露絲拜恩 聲演) 的懷抱，但「澤茜」完全唔聽使喚，反喝令阿肥衝出舒適圈，例如：迫他向女神琪琪 (亞歷山德拉詩普 飾) 表白？出街同朋友把酒談心？甚至挑戰極限名人Party？...... 儘管餐餐撞板，但唔再怕死嘅阿肥與琪琪奇蹟撻著，而澤茜亦同時愛上阿肥，因妒成恨的「她」將結合網絡與科技優勢，威脅阿肥回心轉意！

其實如果將手機轉返作人，即主角有個女仔朋友可能唔太吸引，一路幫佢改變人生，指指點點，然後當主角大個仔有拖拍時就呷醋，最後發覺原來關係已唔止朋友咁簡單............如果這是人，根本就老土得很的故事，不過換成手機就有點不一樣，畢竟比最後發覺原來大家係兄妹唔可以一齊來得有趣，其實連冥婚都可以做題材，同電話結婚又未嘗不可，電話來講加D配件你想點玩都得啦！又有一個哲學的問題，人是否可以同AI或非實體的靈戀愛？如果人可以同「靈」戀愛，咁係咪超越左物種褻瀆左造物者？又唔駛咁遠如果AI可代入做你老母，日日煩住管住你，做你老母可能好過做你老婆，未來AI老母反而有得諗，有咩得罪人比人問候你電話姐！

有時想法太複雜倒不如輕輕鬆鬆入場大笑一番，前題係套戲要堅引到我笑，否則不排除我會大叫『回水』同「除褲」，睇個預告同外國口碑呢套野可能都可以一睇。

電影資料--片名：擇洗溝宅男

上映日期：2020年3月5日

導演：鍾魯卡斯、史葛摩亞

主演：亞當迪凡、露絲拜恩(聲演)、亞歷山德拉詩普、米高皮拿

語言︰英語

級別︰IIB

片長︰85分鐘

類型︰喜劇、愛情