玩音響的朋友近日可能聽多左音樂，如果你已經為你家中影音執過幾次位，玩到玩具反轉咁濟不如試試大掃除，除左將玩具影音用抹布抹乾淨仲可以試試入返個音響專用除靜電掃Brush hard，由日本 Analog Relax推出，掃除音響器材的靜電，令聲音明亮純淨動態伶俐。唔好睇少佢外觀似你老婆的化妝掃，佢真係由日本著名化妝刷牌子「熊野筆」工匠手工製作以三菱化工0.03mm超極細除靜電纖維 Corebrid B製成，成品比舊式其他同類刷多三倍纖維量，可有效去除靜電移去灰塵從而帶來可聞的聲音改善。唔信唔緊要，音響就係好多神奇有用的產品，最緊要唔好因為太靚比身邊人拿去做女性化妝掃。

其實音響專用除靜電掃掃呢個都唔係第一個，之前都有幾個唔同品牌推出過，不過最新呢個Analog Relax稱用料精良纖維量大增，更加有用。由於熊野的工匠製造出直徑為0.03毫米的超細“消除靜電”纖維，所以「掃掃」具有最高的柔軟度。美觀實用，全球相信只有日本人能夠造出呢種產品同呢種高質量。講講「靜電」的問題，主要當來自黑膠類轉盤甚至CD轉盤轉動時加上電器特性就好容易產生強大的靜電，強大的靜電會引致器材吸付灰塵，而多塵加上持續靜電的影響，音響的靜態性能就會受影響無法充分發揮出來，並且會出現聲音持續下降而音質受損的現象。

Brush hard使用直徑為0.03mm的丙烯酸纖維，但是其內部是“中空”並且包含導電物質可以吸引靜電並通過將其排放到空氣中來釋放電暈。由於非常柔軟所以使用唔會傷害音響器材的表面。原廠仲配有專用特殊彈性網同一個高貴的專用收納盒。使用上更高貴大方華麗得體。

有呢個掃在家得聞清除下器材靜電無論掃轉盤CD機甚至膽機都非常有用，不過記得掃除靜電時要關上電源以免發生意外，掃一掃清潔好再開聲，保證聲音有所不同，音響就是咁神奇，唔信同唔想買的一定會覺得又出來故弄玄虛搵人笨，不然你去試試！ 係啦Analog Relax的除靜電刷 Brush hard，價格約為 ¥17,800 日圓（未含稅）。即約港幣1260元，可能都算係最貴的化妝掃。