而家世界聞Corona色變，早前墨西哥Corona 啤酒就因為疫情而停產，係音響世界原來都有一個好特別的德國喇叭品牌Lansche audio，使用獨家的「Corona」電離子高音，我姑且叫佢「新型」電離子高音，呢種世上獨特的高音單元突破主流產品中依靠震膜的物理及機械性限制，直接通過電暈高壓放電震動空氣出聲，做到其他喇叭高音單元都無的超級低失真，咁有無缺點呢？有！生產成本極高，入手門檻自然都非一般，今日就簡單咁介紹一下呢種特別的「新型」電離子高音喇叭。

音響世界其實好大，喇叭一般由不同單元組成，除左一體的同軸和全音喇叭，一般喇叭至少都有兩個唔同單元分頻組成，高音單元通常是獨立自成，再加中低音或細膩分為超高，高音，中音，低音、超低音單元等等，分得愈仔細分頻就愈複雜，作為入門音響發燒友，今日我只單單聚焦高音單元，而且特別只講下世上獨特的一種高音單元，電離子高音，好多有年資的發燒友又會將呢種高音稱為「火焰高音」，相信部份發燒友係過去的香港音響展中可能都見識同試聽過呢種電離子高音製成的喇叭。

其實講呢種電離子高音暫時世上只有兩間大廠生產製作，當然唔排除有高人能夠自製，主要係來自德國的Lansche audio 以及另一間更具名氣的Highend號角喇叭品牌Acapella Audio Arts，最專門又強大的自然係Lansche audio ，因為佢做到內部8mm長的電弧發聲，相較起Acapella Audio Arts 4mm的管徑直徑，面積增加左四倍，靈敏度就提高一倍，音樂中的密度增加，細節的表現也更多更豐富。當然唔同廠都有其特別的喇叭設計同方法，Acapella Audio Arts的號角喇叭有其他唔同的做法絕招，所以唔能夠一概而論。

一般喇叭高音都係靠震膜物理震動發聲，唔同的物料就有唔同的聲音和特性，但物料通常都有唔同限制，電離子高音無感應音圈，無唔均勻的磁場，無共震膜，無任行擺動質量彈簧系統，無非線性懸架。只有光和空氣用火焰推動空氣傳聲。理論上佢由1,500 Hz到150,000 Hz的整個發射頻率範圍內，沒有任何其他與系統相關的共震！理論上無其他高音單元可以比擬。而佢的原理對於熟識科學的人來講並不複雜，就是利用二個電極之間所產生的高壓電弧去推動空氣(令到空氣膨脹)，而電弧的震動頻率丶大小取決於輸入音樂訊號的頻率與強弱。由於推動空氣的不是傳統震膜，而是電弧，理論上質量接近零,可以再生極高的頻域，而且反應速度超快。純理論上離子高音是非常理想的高音單體。

不過原來呢D咁特別又講到好勁的「新型」離子高音又唔係咩新科技，1923年就已經有所謂的「電暈放電式」喇叭，最初發明呢類理論更加要推早到1899年英國的物理學家 William Duddells，佢係19世紀未已發明到用呢種科學的樂器稱為「會唱歌的電弧」( Singing arc)。當然申請成為專利去發聲出喇叭就要到1946年。至於點解呢種喇叭高音叫做「Corona」電離子高音，原來因為Lansche audio所採用的離子高音來自創立1977年的德國Corona Acoustic公司,創始人名叫Otto Braun 。後來到1990年時, Otto Braun退休，就將公司Corona Acoustic及技術賣给Rudiger Lansche,即今天日Lansche Audio喇叭，於是就叫做「Corona」電離子高音，同D咩野冠狀等完全無關系。

「Corona」電離子高音講到咁無敵咁點解得佢一間半間廠自己研究出呢？做喇叭困難係邊度呢？原來其中一個難度係配對，要配對返對應的中低音單元，電離子高音可以延伸至150KHz,所以低音也必須向下延展,否則就會產生頭重腳輕的不平衡感，所以德國Lansche audio要好花心機去做好喇叭的低音下潛要達到30HZ，所以佢地無推出書架箱，只有落地喇叭，因為要保證有強大沉潛低音，讓佢地喇叭超高超低強大的延伸，保持聲音平衡。另一點也是重大的一點就係本身個高音相當難做，容易的話其他廠全部跟就得，製作主要問題係要令到電極(通常是石英)產生電弧需要高壓，而高壓就會產生高溫，引致到電極很容易就損壞了。此外,電弧放電時會產生臭氧(O3)與笑氣(N2O，一氧化二氮)，以原始的方式土法生產係密閉嘅聆聽空間，係放毒。而要抵消臭氧溫度就要達到800度高溫，即等於一個火爐係喇叭入面，長期高溫又要散熱，一般喇叭廠無可能做？Lansche audio值錢在佢克服哂所有理論的困難，真係做到唔會有危險可以長期用，外觀內涵聲音都出色的製成藝術品。點可以生產到就有少少商業的祕密，你要去問下德國Lansche audio。我只知道離子高音的號角是由特殊塗層的金屬做成的，散熱非常良好。怪唔之得喇叭頂有個好像碳爐咁的出風頂，但唔會燙手放心。

講左咁多只單純簡單介紹下呢個世界有種使用「Corona」電離子高音的喇叭，有興趣的朋友可以留意一下呢個叫Lansche audio的德國品牌，佢聲音係極度中性，有極緻嘅頻寬同分析力非常純淨聲音密度極高，不過音響有趣在於唔同人有唔同口味，完美中性唔一定是人人愛，最後這品牌肯定是Highend等級，想知道最完美中性的高階喇叭係點樣聲音，以後留意住佢啦！