如果你對外星人、UFO之類感到興趣，你應該有留意到呢兩日都有報導指美國國防部公開咗三條「不明飛行物體」嘅片段，但假如你真係對呢類嘢有興趣，你又應該會發現呢單其實唔係「新」聞，因為整件事都發展咗兩年架啦！

話說早於2017年尾到2018年頭，由美國樂隊Blink-182主唱所創立嘅私人公司「The Stars Academy of Arts & Sciences」已經發佈呢三條片，據報最先係由著名黑客組織Anoymous由國防部盜出，內容2004及2015年，軍方雷達捕捉到速度極高嘅不明飛行物體(UFO)。到去年9月美國海軍發言人Joseph Gradisher向解密網站《The Black Vault》證實片段的確係美國軍方雷達紀錄，但就拒絕用「UFO」黎稱呼片段中嘅不明物，而強調係「Unidentified Aerial Phenomena (UAP) 」，亦即係「不明空中現象」。

而最新嘅發展，就係美國國防部主動公開呢三條片，五角大樓發言人Sue Gough指咁做為咗「消除大眾對片段真偽的疑問」，即係比返個Source出黎大家Fact Check咁解；同時亦指經過詳細檢查後，認為發佈呢三條片「不會洩漏任何敏感功能或系統，亦不會影響日後對入侵軍事領空的不明空中現象的調查」，換個角度睇，即係佢哋認為呢三條片放出黎你哋都唔會搵到啲咩特別嘢，咁就放畀你睇咁囉。