要數Russell Crowe 羅素高爾嘅代表作，相信唔少人都會諗到2000年上映、拎咗奧斯卡最佳電影兼令其成為金像影帝嘅《Gladiator (帝國驕雄)》。但Russell Crowe近日上Jimmy Fallon的《The Tonight Show》時指，當年佢收到《Gladiator》份劇本，簡直係差到爆！

Russell Crowe於節目上接受網上訪問宣傳新作《Unhinged (爆怒時速)》，提到一開始睇到劇本其實係拒絕出演，到後來同其他演員朋友傾起，先發覺自己唔想拍係因為戲中充滿憤怒嘅角色太真實，自己驚。於是佢改變主意決定接拍，希望透過電影引起大眾對呢種社會氣氛嘅反思。

然後佢就提到，其實當年收到《Gladiator》個劇本時，都曾經考慮過拒絕，因為「當時份劇本實在太差…太差！」他指當時的製作人並唔知道佢已經睇哂成份劇本，但就同佢講「我唔想將手頭上嘅文件(劇本)畀你，因為你唔會回應，但我非常鼓勵你去同導演Ridley Scott見個面。我淨係想你記住，係公元前180年，你係一個羅馬將軍，而Ridley Scott係導演。」

結果Russell Crowe被Ridley Scott對《Gladiator》嘅準備，包括概念圖、點樣唔起個鬥獸場出黎但又拍得出個鬥獸場等計劃說服，但佢亦承認「當時肯定係有啲風險」，甚至直到開拍第一日佢都唔係太有信心。直到拍攝最後階段，佢見到同劇所有演員融入Ridley所創造嘅羅馬帝國中，佢先相信呢部電影會係與別不同。