受疫情影響，全球戲院大規模停業，為咗保住票房，各大電影公司亦將旗下作品嘅上映日子一拖再拖。但原本2020年上半年要上嘅戲拖到依家下半年，為咗避免自己打自己，結果就係本身下半年要上嘅電影亦要延到下年，然後又影響埋下年嘅安排，影響有如滾雪球一樣越滾越大，亦代表電影公司嘅回本期越拖越長。有見及此，各大電影都開始將部份作品推上線上串流平台。例如近日就有報導指Disney會將Amy Adams主演嘅心理驚慄片《The Woman in the Window》賣畀Netflix。

《The Woman in the Window》由Amy Adams、Gary Oldman、「Falcon」Anthony Mackie及Julianne Moore等主演，故事則改編自A. J. Finn.嘅同名小說，劇情與希治閣嘅《後窗》有幾分相似，都係指主角(Amy Adams) 睇到鄰居窗內發生嘅事後所引起嘅一連串事件，可見無論卡士定係劇情都頗為吸引。可惜嘅係電影原定於上年10月上映，後來延到今年5月，最後因為疫情而被直接抽出，依家上映無期，為咗加快回本速度，Disney先至有意將此作推上串流平台。

值得一提嘅係Disney已經擁有自家串流平台Disney+，其他直接網上發佈嘅Disney旗下電影例如《Breaking Bad》男星Bryan Cranston主演嘅《The One and Only Ivan》、今早宣佈嘅《花木蘭》等都係直上Disney+，咁點解《A Woman in the Window》要益實際上係競爭對手嘅Netflix呢？就係因為Disney+ 主打合家歡內容，但你睇「心理驚慄片」呢個類型都知《A Woman in the Window》肯定唔「歡」，所以就唯有退以求其次與Netflix商討合作。

再值得一提嘅係，《A Woman in the Window》其實係20th Century Fox被Disney收購前拍落嘅最後一部作品，所以先會與Disney其他作品如此格格不入。