據外國傳媒《The Hollywood Reporter》獨家報導，香港歌手、近年主力電影發展嘅何超儀，將會伙拍曾執導《安娜》、《露西》、《第五元素》等作品嘅法國名導演Luc Besson (洛比桑)，製作兼主演兩部動作電影。

據報，超儀與丈夫陳子聰成立嘅「852電影公司」參與幕後製作，包括投資、製作及拍攝，超儀夫婦亦會負責部份製作人工作。之於兩套電影，目前淨係知道兩部都係動作電影，預計係以英文為主，最快會於2021年開始拍攝，預料會來港取景。此次亦會係Luc Besson自八月初辭去由佢創立嘅「EuropaCorp電影公司」主席後，首部公開製作嘅作品。

據報Luc Besson於2011年與楊紫瓊合作拍攝《昂山素姬》時認識，後來楊紫瓊於香港介紹Luc Besson予超儀。

值得一提嘅係，超儀早前已經與Bella Thorne合作，拍攝《Habit》，接下來亦會主演由Tony Kaye執導嘅音樂劇電影，仲有一套由《雲圖》編劇Bruce Wagner參與製作、預定今年尾開拍嘅《Marvel Universe (同Marvel漫畫無關)》。換言之超儀已經有4部電影喺手。