返工大家聽到有人話某啲嘢要品牌化、品牌化，咁實際上點先為之「品牌化」呢？個人覺得就人家鍾意你啲嘢，鍾意到你去搞啲基本上完全唔關事嘅嘢大家都會支持你，咁就叫品牌化。如果要我舉個例，就係《EVANGELION》呢套作品，佢由動畫起家，到出劇場版，到近年「Hello Kitty式」嘅週邊，早年搞過賽車隊，依家仲加入電競嘅行列，真係非常成功嘅品牌化！

《EVANGELION》嘅製作公司khara早前與日本JAMMY推出一系列名為《EVANGELION E: PROJECT》嘅電競週邊，包括Keyboard、散熱扇、頭戴式耳機、電腦機箱等等，近日更加宣內成立日本電競隊「EVA:e (エヴァ:e)」，並會於9月23日嘅東京線上電玩展 2020首次登場。

目前隊伍名單中包括一整隊《Rainbow Six: Seige》戰隊、《Street Fighter V》選手Persia、《PES》世界賽四強嘅Masachu、以及三名負責宣導嘅行政人員。由於人員名單正路，官網、Logo又整好哂，睇黎都真係認真想搞隊電競出黎喎。