主題樂園好多人鍾意去，但唔知點解好多人去到都係行下睇下影下相，叫佢玩機動遊戲就耍手擰頭，我就覺得好浪費囉！而如果你同我一樣都係鍾意玩刺激嘅機動遊戲，咁下年美國奧蘭多環球影城 (Universal Orlando Resort)嘅新「Jurassic World VelociCoaster」就可能係你下一個要征服嘅目標！

過去幾個月一直有傳Universal Orlando Resort正在興建一個以《Jurrasic World》為主題嘅新過山車，但就等到近日Universal Studio先正式確認消息，亦公開咗設計圖及過山車嘅預告。據知全長1.43公里嘅「Jurassic World VelociCoaster」會以彈射形式啟動，一出月台已經係個垂直向上嘅半迴環、中途極速係70mph (~110km/h)，最高點離地47米，緊接嘅係一後幾乎垂直嘅下衝路線。而離心力亦係過山車賣點之一，Universal指乘客於全程中，總共會有12秒「凌空時間」，當中更有一段能感受到「反轉嘅零重力」，絕對會令腎上腺素爆升。

至於你問呢個過山車除咗喺《Jurassic World》園區之內、同會飛過其他同區設施之外，同套戲有咩關係？重要咩？好玩就得啦！