要數到2020年尾最令人期待嘅遊戲，相信由《Witcher》系列開發商CD Projekt Red開發、有Keanu Reeves「出演」嘅《Cyberpunk 2077》一定喺名單之中。而隨住定於11月19日嘅發售日逼近，相信大家都好緊張。但更加緊張嘅就有CD Projert Red嘅員工關係，因為近日有報導指佢哋違反承諾，強制要求員工一個星期返6日。

對香港人黎講，OT、返六日唔係啲咩新鮮事，但對於西方國家黎講，長期OT係頗為嚴重嘅員工權益問題，而遊戲開發界嘅OT問題就特別嚴重，例如早排《Last of Us 2》都有指強逼員OT到屋企都冇得返，亦因為咁近年遊戲界非常著重工時問題，CD Projekt Red嘅創辦人之一 Marcin Iwinski亦曾多次在不同場合中，講到明要締造一個更有「人道」嘅工作環境，唔會要求員工強制OT，即係就算公司叫你加班，員工都可以選擇唔服從而唔會有任何後果。

但據《Bloomberg》收到CD Projekt Red員工爆料，工作室室長Adam Badowski近日向員工發出一封內部電郵，強制要求員工於週末加班一日，雖然OT時間會按照波蘭法例界足錢，但依然係違反咗公司高層當日嘅公開承諾。

但又咁講，雖然要員工強制OT，但Adam Badowski封Email嘅措詞喺香港人眼中都算好低聲下氣，唔止講到明搞到大家要OT係佢嘅責任而佢會負全責，亦坦承係違背咗當初嘅承諾、以及佢自己嘅信念，但「試過所以其他方法」都唔夠嘅情況下，就唯有叫大家OT。

而從公司嘅角度睇亦唔難理解呢個決定，《Cyberpunk 2077》原定今年4月推出，然後延期到9月，再延期到11月19日，中間仲要預時間提交隻Game畀Sony同Microsoft審查，如果要趕得切於11月推出，實際上剩返嘅開發時間真係唔多。但另一個問題就係，既然你講話要締造人道工作環境、既然隻Game都延期咁多次，其實都唔爭在延多一頭半個月，等啲員工唔使OT啦？