相信依家最多人想擁有嘅遊戲主機一定係PS5，你睇佢啲Game又好玩、啲畫面又靚、個手掣又好揸，以一部遊戲主機黎講好似都完美啦係咪？但Budweiser旗下嘅Bud Light就出咗部比起PS5更「勁」嘅主機——勁在佢唔單止係主機，仲係一個雪櫃！

圖片：Shopbeergear

呢部「BL6」體積、外型都同一Pack六罐啤酒差唔多，但其實入面仲收埋咗部有16GB Ram遊戲主機，可以玩到《鐵拳7》、《SOUL CALIVBUR VI》等6款內置遊戲，仲內置埋ASUS嘅投影機，等你去到邊都可以玩。不過要講到最強大嘅功能，就係佢聲稱可以一路玩，一路「雪凍」埋嗰六罐啤酒！對於見慣遊戲主機可以熱到煎蛋嘅機迷黎講，呢個功能簡直係聞所未聞驚為天人。難怪個價錢要2,300美金囉！

圖片：Shopbeergear

不過要留意返，呢部BL6其係Bud Light為咗「美國餐廳協會教育基金」籌款而製作，只此一部之餘，亦只能以拍賣形式買到。而個拍賣頁面對於部機嘅介紹亦相當有限，我就冇咩信心部機真係可以雪凍嗰六罐啤酒啦。