上星期Warner Bros. (以下簡稱 WB) 宣佈，旗下所有於2021年上映嘅電影，都會喺同一集團嘅「HBO Max」串流平台作「同步上映」，主要係為咗於疫情下減少美國本土戲院無人入場而造成嘅損失，同時帶動HBO Max嘅訂閱人數，但同時就犧牲咗院線、製片等多方嘅利益。當時就已經有人質疑WB究竟有冇同其他人商量過先行新政策——答案係冇嘅！事關消息傳出之後，WB連日受到多方批評。

圖片：WIKIPEIDA

首先發聲嘅係美國最大院線AMC嘅主席兼CEO Adam Aron，佢於消息一傳出就立即發出聲明，指佢明白疫情對行業帶來未知嘅影響，所以佢哋早前先同意WB將《Wonder Woman 1984》放於HBO Max上同步上映——但佢哋亦淨係同意咗呢一部、唯一一部電影有呢個安排。佢直言即使依家疫苗有望解決疫情，但WB依然計劃將2021年所有電影都作HBO Max同步，係犧牲製作伙伴以及製片嘅利益，去補貼HBO Max嘅發展，佢哋會積極爭取能夠保存 (院線) 行業嘅經濟條款。

而美國獨立院線聯盟 (ICA) 亦於星期一發表聲明，呼籲將電影放回院線獨家上映。佢哋話「電影嘅價值係在於大銀幕上播放，而非串流」，同時亦指疫情之下獨立院線更需要大家嘅支持。簡單啲講就即係Adam Aron講嘅差唔多，但客氣啲咁解。

《Dune》劇照

圖片：IMDB

圖片：Legendary Entertainment

除咗院線，製片方亦有激烈反應。據《Variety》報導，《Dune》及《Godzilla vs Kong》嘅製片Legendary Entertainment (傳奇影業) 有意就「HBO Max同步」控告WB。卻說傳奇影業為《Dune》及《Godzilla vs Kong》分別投資1.75億及1.6億美金，亦即係大部份錢都係佢哋出，但佔少部份錢嘅WB決定將兩部電影加入「HBO Max同步」時，傳奇影業就完全毫不知情。傳奇影業希望能夠先同WB同層進行商討，睇下有冇其他解決方法 (例如WB出錢將兩部電影全數買下) ，但如傾唔掂數，就可能會控告WB。

圖片：IMDB

而出名支持大銀幕、最新電影《TENET》(都係WB發行) 即使於疫情期間都堅持上映嘅著名導演Christopher Nolan於一個訪問中就指責WB嘅處理手法，佢話「件事而所以咁有爭議性係因為佢哋冇事先同人講過，件事非常、非常、非常、非常肉酸，完全係偷樑換柱。你冇理由咁樣對啲電影創作者同名星，佢哋花咗好幾年去製作一部電影，值得你去諮詢、通知一下佢哋嘅作品會點樣被處理。」

當然，Nolan亦繼續支持電影於大銀幕上上映，「2021年我哋會有世界上最頂尖嘅製作人、最頂級嘅明星，佢哋有啲用幾數以年計嘅時間去創作一部本意係大銀幕播放嘅電影，呢啲電影應該要儘可能地接觸最多觀眾…但依家就被人用黎做低價促銷手段，仲要係個菜鳥串流平台嘅低價促銷——仲要冇人問過佢哋。」

目前WB未有作出進一步回應。

資料來源：Collider、Variety 1 & 2、ETOnline