據英國《太陽報》指，佢哋近日獲得一段Tom Cruise於《Mission Impossible 7》英國片場爆粗怒_工作人員嘅兩分多鐘長錄音，片段可清楚聽到Tom Cruise對工作人員大罵：「再畀我見到就炒_咗你！」。

咁佢究竟見到啲咩而咁嬲呢？據報就係因為有兩名工作人員為咗睇同一部電腦而企得太埋，兩人之間距離少於兩米，違反咗劇組嘅防疫指引。你可能會諗，企埋少少啫唔使又爆粗又炒下嘛？但對Tom Cruise黎講，呢件事絕唔係單單「企埋咗少少」咁簡單。

圖片：IMDB

Tom Cruise話，「我哋 (《MI7劇組》)依家係個黃金標準！荷里活其他戲依家可以拍係因為我哋立咗個好榜樣，因為佢哋相信我哋同我哋做緊嘅嘢 (指防疫措施)。我晚晚都同全_部電影製作室、保險公司、製作人講電話，佢哋望住我哋黎拍佢哋嘅電影，我哋創造緊幾千個職位呀你個冚_剷！我唔要再見呢啲事 (違反防疫指引) 發生！」

「出咗事你自己去同啲冇咗份工嘅人講，佢哋會冇飯食冇錢交學費，我每晚都諗住呢啲嘢瞓呀——呢個行業嘅未來呀！我講到明架啦，依家我要大家做畀我睇，如果你做唔到，你就同我走！唔好搞到呢部拍唔_到！明未？如果我再見到就炒_咗你！」

Tom Cruise於片場長期戴住口罩

圖片：IMDB

簡單啲黎講，就係Tom Cruise認為正因為《MI7》能夠於疫情下安全拍攝，業內其他人先有信心開工；如果《MI7》劇組又有人瀨嘢 (順帶一提，其實之前10月時劇組已經有12個人確診) 而要停拍，就好有可能會連累其他劇組都停拍、啲工作人員就失業。所以《MI7》嘅責任唔單單係拍好部戲咁簡單，而係必須做好防疫措施，話畀人知依家都可以拍到戲。

如果想聽哂成段錄音，可以去呢到。