「瑪利奧賽車」(Mario Kart)係任天堂旗下最具代表嘅遊戲之一，當中嘅瑪利奧兄弟等角色更加係全球知名。而正因為咁，侵權行為就絕對少不免，其中位於日本秋葉原嘅卡丁車公司「MariCar」近日就正式被判定侵權，並需向任天堂賠償5000萬日元。

「MariCar」係一間於日元出租特別服裝及卡丁車嘅公司，只要你有合法嘅國際駕駛執照，你就可以喺日本街頭一嚐呢樣刺激嘅玩意。而當中呢間公司主打出租嘅就係「瑪利奧」一眾角色嘅服飾，令市民可以大玩真人版Mario Kart。

對於呢項侵權活動，任天堂於2017年就已經申請入稟法院，要求禁止「MariCar」嘅侵權行為繼續，並就以上活動進行賠償。及後於2019年作出臨時判決，判定「MariCar」係借用任天堂旗下嘅「Mario」名進行活動，但「MariCar」之後作出上訴，最終最高法院近日終於裁定不受理上訴。

對此「MariCar」只能夠改為，最終改為「MARI モビリティ開発」，同時於卡丁車車身上大大隻字寫住「與任天堂沒有關係」，以澄清兩間公司並不是合作關係。不過見過鬼仲唔怕黑，呢間公司仲夠膽死申請「Unrelated to Nintendo」嘅商標，最終拒絕受理，甚至去到最後呢間公司只要有接近「Mario」相關嘅商標全部都被判無效。

不過其實原「MariCar」嘅老細又唔使愁嘅，不妨考慮進軍坐擁14億人嘅中國市場，提前註冊商標，咁到時Mario Kart咪掉番轉侵權你囉，名都同你諗埋啦，不如就叫「MoneyCar」啦，入中國梗係賺人民幣啦！