有人話《少年Jump》近年迎來另一個黃金期，除咗因為《鬼滅》大熱之外，更重要係《咒術迴戰》及《鍊鋸人》等新作品都獲得不俗人氣。而Megahouse亦將會推出《咒術迴戰》主角虎杖悠仁嘅1/8人偶。

圖片：Megahouse

虎杖悠仁為《咒術迴戰》主角，本身就擁有強大運動神經，一次意外下吞咗強大咒物「兩面宿儺」嘅手指而成獲得咒力，並加入東京咒術高專就讀，與同伴對抗咒物。而Megahouse出嘅呢個1/8虎杖悠仁展現出準備迎敵嘅姿態，粉紅色頭髮刺蝟頭配上略帶玩笑不恭嘅招牌笑容，還原度相當高。而黑色「咒專」校服再配上上紅色衛衣、紅色皮鞋亦充滿細節。

圖片：Megahouse

Megahouse 《呪術廻戦》虎杖悠仁 1/8人偶全高18cm，售價為12,000Yen (約HK$900)，目前接受預訂，預計明年7月正式開售。另外Megahouse亦宣佈下一隻《呪術廻戦》作品會係人氣角色「五條悟」。

資料來源：Megahouse