不經不覺大家已經戴咗成年幾口罩，從當初一罩難求，變到依家啲口罩鋪開到成行成市，口罩花式愈嚟愈多，漸漸演變成一種時尚潮流。電競產品大廠Razer喺今年美國消費電子展（CES 2021）展示一款號稱「The World's Smartest Mask」嘅口罩。

呢款口罩名為Project Hazel，符合N95規格，防水防刮適合重覆使用。為咗改善戴口罩所帶嚟嘅社交不便，外殼採用半透明環保塑膠，等人可以見到佩戴者表情同嘴型。口罩更設有麥克風同喇叭，用家講野聲音會被放大，再透過左右兩則喇叭播出，確保對方能夠聽得清楚又清晰。

話明Razer出品，當然有RGB燈效，用家可以自定義燈效顏色，高達1,680萬隻色任你揀。除左口罩兩則喇叭有RGB燈外，口罩設有光暗感應器，當走入較暗嘅地方，口罩內部會自動著燈，等人地可以睇清楚你個樣。

Project Hazel 可以透過專用充電盒進行無線充電，而且充電盒亦具體紫外線消毒功能，能夠充電同時消毒。由於只處於概念產品階段，暫時未知售價及開賣日期，如果價錢適宜，你哋又有無興趣買返個？