大家第一部擁有嘅電話係咩呢？當年手提電話普及無耐，有一部自己嘅電話可以話非常威水，偷偷地帶返學校玩貪食蛇大大聲播歌即刻變風頭躉，女神都望多你幾眼。但隨著智能電話出現，當年幾間手機巨頭Motorola、Nokia同Sony Ericsson，要執嘅都執曬或賣出手機業務、無執嘅都好似就執。最近就有傳聞指HMD Global繼復刻Nokia 3310、6300、8100後，打算復刻經典手機 Nokia 3650。

HMD Global早幾年就復刻過 Nokia 3310。

翻查資料，Nokia 3650於2003年2月上市，當年非常破格採用復古式圓形撥號鍵盤，搭配2.1英吋螢幕，內建30萬像素鏡頭，仲可以拍片（當年可以拍片好勁㗎），而且可以插MMC卡（記憶卡，SD卡前身）唔怕會拍片拍到無位。

當年Nokia 3650圓形鍵盤設計非常破格。

據外媒gsmarena報導，最近俄羅斯媒體爆料指HMD Global打算復刻呢部經典機，但規格詳情同個樣會整到點就暫時未知。但消息傳出後，激發到荷蘭設計師Jermaine Smit整咗部自己心目中嘅「復刻版Nokia 3650」，保留返經典圓型鍵盤設計，個MON大咗又靚咗咁，如果到時實物同概念圖差唔多嘅話，大家又有冇興趣整返部懷念下。