即使喺科技發達嘅2021年，人類對古文明建築仍未能完全了解，對金字塔、巴特農神殿等世界奇觀係點起依然眾說紛紜，神秘學者又會話係外星人整。但最近浙江大學教授黃河清提出一個更「前衛」觀點，指古文明建築都係西方人偽造，將古埃及同美索不達米亞古文明虛構到更源遠流長，目的在於貶低中華文明。

事源早排黃河清教授上堂影片喺網上曝光，黃教授喺課堂入面指19至20世紀有大量偽造歷史文明嘅情況，點名指明埃及金字塔、雅典巴特農神殿遺跡係現代偽造，更話埃及金字塔同獅身人面像係現代人用石屎整。

究竟係咩原因啟發黃教授諗到呢啲新觀點？黃教授表示自己唔係道聽塗說「齋噏」㗎，透過「以圖證史、以圖辨偽」方法，用上巴黎羅浮宮首任館長畫作，同埋當年跟隨拿破崙遠征埃及嘅科學家團隊所出版嘅《埃及記述 (Description de l’Égypte）》插圖對比，發現插圖入面無埃及大金字塔，加上幾位材料學家研究，從而「實證」金字塔用石屎偽造。

言論傳出後，立即係中國網絡引起熱烈討論，黃教授就表示自己觀點雖然係非主流，但絕對係「無可爭議」。更表示依家嘅問題係「西方造假我哋唔敢懷疑，只要我哋中國人開始懷疑，就發現全是漏洞！」，並話由於西方一直打壓同否定中華文明，提出有關觀點某程度上係為中華文明正名，恢復中華文明真實歷史地位。

黃教授現職為浙江大學考古學院教授，同時係博士生導師，表示自己下過鄉、扛過槍、留過洋，曾出版多部著作。