日本知名漫畫家宮崎駿作品《千與千尋》貴為一代經典，自2001年上映以嚟日本國內累積票房收入超過300億日元，即使推出將近20年仍毫不失色，依家仲可以見到電視台重播及周邊商品推出。最近日本東寶（東宝）宣布將為呢部經典作品改編為真人版舞台劇，並邀請到橋本環奈及上白石萌音共同飾演主角「荻野千尋」。

pic.twitter.com/i0UtXIXoHk

— スタジオジブリ STUDIO GHIBLI (@JP_GHIBLI) February 25, 2021

據日媒《NHK》報導，舞台劇版《千與千尋》將由著名英國舞台劇導演John Caird擔任執導及編劇。將於2022年2月喺東京帝國劇場首映，接著會陸續喺日本各地，包括大阪、福岡、札幌、名古屋等進行巡迴演出。

上白石萌音（左）與橋本環奈（右）將共同飾演「荻野千尋」。（圖片截至：Instagram）

主角橋本環奈表示，佢睇呢部電影嗰陣仲係小學生，當知道自己要飾演千尋時，覺得難以置信，同時亦係出道多年嚟第一次參演舞台劇；而上白石萌音就喺IG上表示，知道有機會參演後以為自己「發緊夢」，感到既興奮又緊張，但會盡力演好呢個角色，期待同John Caird合作。