受疫情影響，動視暴雪再度裁員，規模佔公司整體2%，約190人左右。而CEO Bobby Kotick收入就有增無減，預計三月將突破兩億美金。公司除咗支付至少90日嘅遣散費及最高一年嘅醫療福利之外，更送咗張價值$200美金嘅Battle.net禮品卡。唔通...係為咗被裁員工就算失業都可以課金打機？

據外媒報導，動視暴雪最近裁員約190人，其中有50人嚟自電競部門，甚至旗下公司《Candy Crush》開發商King都有份。為咗令被裁員工可以過渡呢段日子，暴雪將會支付至少90日嘅遣散費及最高一年嘅醫療福利。唔知係攞景定贈慶，暴雪仲送多張價值$200美金嘅Battle.net禮品卡，唔通...係為咗被裁員工就算失業都可以課金打機？

有禮品卡都好嘅，可以喺暴雪旗下遊戲課金，順便幫前公司賺錢。（圖片截至：AMAZON）

另一邊廂，動視暴雪CEO Bobby Kotick就因公司近年股價不斷上升，從而獲得巨額分紅。根據CtW Investment Group估計， Bobby Kotick三月份收入將突破2億美金。另外，暴雪為咗嘉許Bobby Kotick帶領公司股價上升，仲頒咗個金牌畀佢。

動視暴雪CEO Bobby Kotick。

美國唔少大企業都有「肥上瘦下」嘅情況，上年暴雪股價大漲嗰陣，就有員工以匿名方式公開自己收入細節（薪金及漲幅），藉此抗議員工收入同公司收入不成正比，公司搵大錢員工就加得嗰少少。可惜暴雪唔單只無調整人工，近年仲多次裁員，喺2019年炒咗近800人，今次就炒190人。

資料來源：kotaku、bloomberg