當大家對哈勃太空望遠鏡所拍到嘅照片為之讚嘆時，你又知唔知佢其實係由「發現號」穿梭機運送上去？最近LEGO為興祝穿梭機發射40週年，同NASA合作推出「發現號」穿梭機Lego套裝，當中更配備哈勃太空望遠鏡！

雖然第一部穿梭機係「哥倫比亞號」，但LEGO可能唔想大家諗返起啲唔開心嘅事，今次選擇推出STS-31任務Lego套裝，即係「發現號」穿梭機運載哈勃太空望遠鏡個次任務。Lego以1:70比例還原，總共有2,354個零件、長54cm、高21cm，可以話係相當之「大件」。除咗外觀上充分還原外，機身內嘅負載艙亦搭載咗哈勃太空望遠鏡、起落架同機械手臂。

當中嘅哈勃太空望遠鏡亦可以獨立放出嚟展示，不過官方就無公布具體尺寸，但佢塞得入負載艙，應該唔會好大件。望遠鏡嘅太陽能板、天線同艙門都有可動機關，金色嘅太陽能板配上銀色反光機身令成個Lego充滿「太空感」。

呢盒Lego都唔算貴（相對嚟講），最大問題應該係搵地方擺。價格為199.99美元（約$1500港幣），4月1日起公開發售。

資料來源：LEGO